Ndeshja Fiorentina-Inter u ndërpre në minutën e 18-të të lojës. Gjyqtari i takimit mori këtë vendim pas një episodi të rëndë. Edoardo Bove ra në mes të fushës në një mënyrë të pazakontë dhe ndeshja u ndal menjëherë, derisa të kuptohet nëse lojtari është mirë.
Lojtarët e skuadrës violë po përpiqen të rrethojnë shokun e ekipit, që kamerat të mos fiksojnë asnjë pamje të portretit të tij. Situata është shumë serioze dhe delikate.
Ka lojtarë që vënë duart mbi kokë. Disa të tjerë po qajnë. Lojtari u transportua me urgjencë në spital.
“Ndeshja nuk do të rifillojë dhe do të shtyhet për një datë të mëvonshme. Kur loja u ndërpre, Bove u rrëzua përtokë dhe situata u duk menjëherë shumë e rëndë. Një ambulancë e mori lojtarin, priten lajme”. Kështu shkruan Lega Serie A.
