Policia kryeqytetit ka vënë në pranga dy persona, Klajdi Serjani, 24 vjeç, dhe Euxhenjo Manushi, 20 vjeç, në lidhje me veprën penale të shpërndarjes së lëndëve narkotike.
Mësohet se dy të rinjtë janë arrestuar nga Antidroga e Tiranës te rrethi i Kamzës, ndërsa dyshohet se grupi operonte në zonën e Parkut të Autobusëve.
Blutë njoftojnë se gjatë operacionit, dy të arrestuarve u janë gjetur në makinë dhe më pas sekuestruar më shumë se 1 kg kokainë me vlerë tregu rreth 270 mijë euro.
Vijon ende puna për identifikimin e më pas kapjen e anëtarëve të tjerë të grupit.
Njoftimi:
Shërbimet e Sektorit për Hetimin e Narkotikëve, në vijim të operacioneve të njëpasnjëshme për goditjen e veprimtarive kriminale në fushën e narkotikëve, të mbështetura nga inteligjenca policore, në kuadër të një procedimi penal ndjekur me metoda proaktive, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, kanë organizuar dhe kanë finalizuar operacionin policor të koduar “Fam Fanz”.
Gjatë këtij operacioni u arrestuan në flagrancë shtetasit Klajdi Serjani, 24 vjeç, dhe Euxhenjo Manushi, 20 vjeç, të dy banues në Tiranë.
Shërbimet e Policisë kanë lokalizuar në rrugën “Kastriotët”, automjetin me drejtues shtetasin K. S., dhe pasagjer shtetasin E. M. Gjatë kontrollit fizik të shtetasit K. S., shërbimet e Policisë i gjetën 1 kg e 50 gramë lëndë të dyshuar narkotike kokainë.
Lënda narkotike, së bashku me një shumë parash dhe celularët e shtetasve të arrestuar, u sekuestruan në cilësinë e provës materiale.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
