Politologu Afrim Krasniqi, ka publikuar një dokument të vitit 1991, kur në Shqipëri janë mbajtur zgjedhjet e para pluraliste dhe në Tiranë kandidonte vetë Ramiz Alia, drejtues i Partisë së Punës së Shqipërisë.
Në Tiranë, në zonën ku kandidonte Ramiz Alia, opozita fillimisht nuk donte të dërgonte kandidat, për shkak se mendonte se ishte e sigurt humbja.
Në momentet e fundit, një inxhinier i panjohur në politikën disamujore pluraliste, Franko Kroqi, u regjistrua përballë njeriut më të fuqishëm të kohës. Fitoi 62% të votave. Tirana urbane votoi kundër regjimit të vjetër.
Franko Kroqi nuk bëri jetë aktive parlamentare dhe as politike, kaloi në diplomaci dhe më pas në profesionin e parë, duke ndenjur jashtë vëmendjes publike.
Afrim Krasniqi përmend një fakt interesant, sipas të cilit Ramiz Alia rezulton se ishte i vetmi drejtues i bllokut komunist në Europën Lindore që humbi në garën personale për një vend parlament. Shumica fituese e PPSH e zgjodhi President, por rezultati i zonës 218 mbetet historik.
“Fakt: nga ata që kandiduan Alia ishte i vetmi drejtues i bllokut komunist në Europën Lindore që humbi në garën personale për një vend parlament. Shumica fituese e PPSH e zgjodhi President, por rezultati i zonës 218 mbetet historik.
Me katër mesazhe: ndryshimi vjen përmes kurajos së qytetarisë, sistemi mazhoritar krijon konkurrencë reale, në zgjedhje më i pushtetshmi nuk është apriori fitues dhe se Shqipëria e fitoi në dhjetor ’90 pluralizmin me sloganin liri-demokraci, por katër muaj më vonë votoi masivisht pro atyre që ia kishin mohuar ato.
Sindroma e Stokholmit? Mungesë kulture politike? Frikë nga ndryshimi? Shoqëri e vonuar në procese historike? Të gjitha së bashku?! Kështu nisi”, përmbyll politologu.
