Konsumi i kokainës në Greqi ka pësuar një rritje të ndjeshme gjatë viteve të fundit, sipas analizave të ujërave të zeza urbane të Athinës. Gjetjet tregojnë se grekët konsumojnë afërsisht gjysmë ton kokainë në vit, me një trend rritës të vazhdueshëm që nga viti 2020.
Sipas të dhënave, konsumimi i kokainës rritet ndjeshëm në periudha festive si Krishtlindjet, Viti i Ri, dhe gjatë festivaleve muzikore verore. Në këto raste, konsumi ditor arrin nga 1.5 kg në 3 kg kokainë, duke dyfishuar nivelin “normal” të përdorimit. Kokaina është substanca dominuese e përdorur në Greqi.
Profesori i Kimisë Analitike, Nikos Thomaidis, ka nënvizuar në intervistat për mediat greke se analiza e ujërave të zeza është një metodë e qëndrueshme për të monitoruar trendet e përdorimit të substancave narkotike. Ai theksoi se përdorimi i kokainës është bërë më i aksesueshëm pas pandemisë së COVID-19, duke reflektuar një fenomen të gjerë evropian.
– Në vitin 2010, përdorimi i kokainës llogaritej në 0.47 kg/ditë.
– Në vitin 2023, kjo shifër është trefishuar, duke arritur në 1.11 kg/ditë.
Thomaidis thekson se përdorimi i kokainës dhe substancave të tjera, si ekstazi dhe kanabis, dyfishohet në periudha festive për shkak të abuzimit më të madh gjatë këtyre ditëve. Ai shton se rritja e aksesit dhe furnizimit me kokainë është një faktor i rëndësishëm që ka kontribuar në këtë fenomen.
Në krahasim me vitin e kaluar, rastet e COVID-19 dhe gripit kanë qenë më të ulëta, ndërsa monitorimi i ujërave të zeza vazhdon të ndihmojë në parashikimin e tendencave shëndetësore dhe sociale në Greqi.
