Këshilltari suedez për sigurinë kombëtare, Henrik Landerholm, ka dhënë dorëheqjen pas nisjes së një hetimi policor mbi humbjen e dokumenteve të klasifikuara. Dokumentet, të cilat Landerholm i kishte lënë gabimisht në një hotel në mars të vitit 2023, u gjetën nga stafi i pastrimit dhe u rikuperuan më pas nga një bashkëpunëtor i tij.
Landerholm, që prej emërimit kishte ngjallur polemika për shkak të lidhjeve të tij të ngushta me kryeministrin Ulf Kristersson, është përfshirë edhe më herët në situata të sikletshme, si harrimi i një fletoreje gjatë një interviste dhe lënia e telefonit të tij në ambasadën hungareze.
Në deklaratën e tij, Landerholm tha: “Jam informuar për hetimin dhe kam njoftuar kryeministrin. Në këto rrethana, nuk mund të vazhdoj detyrat e mia.” Kryeministri Kristersson, që e kishte mbrojtur këshilltarin përballë kritikave të opozitës, pranoi se rrethanat aktuale e bënin të pamundur vazhdimin e detyrës nga Landerholm dhe konfirmoi se procesi ligjor do të vijojë.
