Gati një në tre amerikanë mbi moshën 60 vjeç, afërsisht 19 milionë njerëz, marrin aspirinë çdo ditë, citon Annals of Internal Medicine.
Aspirina është një ilaç pa recetë që përdoret për një sërë arsyesh. Përveç trajtimit të dhimbjes, mjekët mund të përshkruajnë aspirinë për pacientët që janë në rrezik të sulmit në zemër ose goditje në tru, sipas Harvard Health.
Këto dy gjendje serioze shëndetësore ndodhin kur formohen pllaka në arterie, të cilat mund të ngadalësojnë rrjedhën e gjakut në trup dhe të shkaktojnë formimin e mpiksjeve të vogla të gjakut.
“Aspirina mund të reduktojë sulmet në zemër dhe goditjet në tru, dhe deri në një farë mase mpiksje të tjera si ato në venat e thella të këmbëve. Në doza të ulëta, aspirina pengon trombocitet dhe për këtë arsye redukton mpiksjen e gjakut,” tha Michael J. Blaha, drejtor i Kërkimeve Klinike për Ciccarone Johns Hopkins Center për Parandalimin e Sëmundjeve Kardiovaskulare.
Hollimi i gjakut dhe, për rrjedhojë, zvogëlimi i mundësisë së mpiksjes është një avantazh i caktuar për ata që janë në rrezik më të lartë të problemeve kardiovaskulare. Por kjo nuk e bën aspirinën një kandidat kryesor për të gjithë.
“Në sëmundjet kardiovaskulare, ne zakonisht preferojmë hollimin e gjakut sepse shumë sëmundje kardiovaskulare janë rezultat i mpiksjes së gjakut”, tha Blaha. “Megjithatë, hollimi i gjakut shoqërohet në mënyrë të pashmangshme nga një rrezik i shtuar i gjakderdhjes”.
