Një përmbytje e mundshme e ujërave të zeza e shkaktuar nga një ‘bllokim i madh’ në një kanalizim ka detyruar organizatorët e një koncerti të Bryan Adams në Australi të anulojnë ngjarjen.
Kantautori kanadez ra viktimë e një rrjedhjeje të ujërave të zeza në qytetin e Perth, në Australinë Perëndimore, të dielën mbrëma, “për shkak të rrezikut të tejmbushjes së ujërave të zeza në tualetet në vendin e koncertit”, njoftoi kompania lokale e ujit.
“Ekipet tona po punojnë për të hequr bllokimin”, tha kompania në një deklaratë përpara koncertit, por më pas njoftoi se bllokimi “nuk mund të riparohet lehtë” dhe se organizatori kishte marrë “vendimin jashtëzakonisht të vështirë për të anuluar koncertin e Bryan Adams”.
“U konsideruan masa alternative, duke përfshirë përdorimin e cisternave, por sasia e ujërave të zeza që do të prodhohej nga një audiencë prej 16,000 personash në sallë u konsiderua shumë e madhe”, thuhet në deklaratë. “Ne sigurisht e kuptojmë zhgënjimin e njerëzve”, shtojnë ata.
Promovuesi i koncertit ‘Frontier Touring’ tha se anulimi i koncertit ishte “zhgënjyes”, por përtej kontrollit të Adams dhe se çmimet e biletave do të rimbursoheshin automatikisht.
