Ylli Manjani ka ironizuar pretendimet e Sali Berishës dhe mediave të tij, se sekretari i Kryeministrisë, Engjëll Agaçi, është arratisur nga frika e arrestimit.
Ai ironizon edhe pretendimin tjetër, se BKH ka hyrë në Kryeministri dhe ka sekuestruar laptopin e Agaçit.
“Dy perlat e javës që sapo lamë ishin:
1. Arratisja e Engjell Agacit nga frika e arrestimit.
2. BKH ka hyrë në Kryeministri dhe ka sekuestruar laptopin e Engjellit.
Hahahahahahahah.
D.m.th, unë nuk e di vërtetë ka ikur apo jo Engjell Agaci? Ka sekuestruar apo jo BKH laptopin e tij?!
Kam dëgjuar që është sëmurë nga një insuficensë cardio-pulmonare. Me të dëgjuar e kam.
Por nuk kam nevojë të di më shumë për të kuptuar se:
1. Arratisja nga Shqipëria nuk të shpëton nga procedimi penal, as nga marrja e masave të sigurisë e as nga dënimi. Mund ti shpëtosh deri në një farë pike burgut, por jo sekëlldisë të të qenit në kërkim në pjesën e mbetur të jetës.
2. BKH, nuk ka asnjë shanc të bëjë cubin në një institucion si Kryeministria, siç ua bën të tjerëve në rrugë apo mjedise private. Nuk arrij të imagjinoj çfarë aksioni mund të kenë bërë 2 apo më shumë oficerë të BKH, për të kaluar gardhet e sigurisë dhe të kenë hyrë serbes në zyrën e Engjell Agacit, të paktën pa asnjë copë letër.
Kaq më mjafton të kuptoj që debati publik “iku apo erdhi Engjelli” është kot dhe krejt pa kuptim.
Shpresoj mos të jetë bumerang për opozitën që gjatë gjithë javës këtë refren të pallogjikshëm ka kënduar.
****
Ah po, sot më ka paguar Engjell Agaci, që të mos keni ndonjë dyshim…”, shkruan Manjani.
