Kryeministri grek Kyriakos Mitsotakis zhvilloi një telefonatë me presidentin ukrainas Volodymyr Zelensky për të diskutuar zhvillimet kryesore përpara samitit të posaçëm të Këshillit Evropian që do të mbahet më 6 mars në Bruksel.
Sipas burimeve qeveritare greke, Mitsotakis siguroi Zelenskyn për solidaritetin e palëkundur të Greqisë ndaj Ukrainës dhe ripohoi angazhimin e Bashkimit Evropian për paqen e qëndrueshme në Ukrainë.
Kryeministri grek theksoi nevojën për rritjen e aftësive mbrojtëse të BE-së, mbështetje të vazhdueshme financiare dhe ushtarake për Ukrainën, si dhe bashkëpunim të ngushtë me Shtetet e Bashkuara për çështjet e sigurisë.
Samiti i jashtëzakonshëm i udhëheqësve të BE-së në Bruksel do të fokusohet në shpenzimet e mbrojtjes, mbështetjen për Ukrainën dhe sfidat e sigurisë në Evropë.
