Opozita e qendrës së djathtë të Grenlandë ka fituar zgjedhjet e saj të përgjithshme, tregojnë rezultatet pothuajse të plota, në një votim të dominuar nga premtimi i presidentit amerikan Donald Trump për të marrë territorin autonom të Danimarkës.
Me më shumë se 90% të votave të numëruara të së martës, partia Demokraatit – e cila favorizon një qasje graduale ndaj pavarësisë, po merr gati 30% të votave, thonë zyrtarët zgjedhorë.
Naleraq, një tjetër parti opozitare e cila dëshiron të nisë menjëherë procedurat e divorcit nga Kopenhagen dhe të ketë lidhje më të ngushta me SHBA, është e dyta në sondazh me rreth 25%.
Grenlanda – ishulli më i madh në botë, midis Oqeanit Arktik dhe Atlantik – është kontrolluar nga Danimarka, gati 3,000 km (1,860 milje) larg, për rreth 300 vjet.
Grenlanda i drejton punët e saj të brendshme, por vendimet për politikën e jashtme dhe të mbrojtjes merren në Kopenhagë.
Rreth 44,000 grenlandezë nga një popullsi prej 57,000 kishin të drejtë të votonin për të zgjedhur 31 deputetë, si dhe qeverinë lokale.
Gjashtë parti ishin në fletëvotim. Partia Siumut – partnerja e Egedes në një koalicion qeverisës të krahut të majtë aktual, është në vend të katërt me afro 15% të votave.
Dy partitë e tjera janë shumë prapa, me Atassut me 7%, dhe Qulleq me pak më shumë se 1%.
Votimi u zhvillua në 72 qendra votimi të shpërndara në të gjithë ishullin e gjerë.
Vendndodhja strategjike e Grenlandës dhe burimet minerale të pashfrytëzuara kanë rënë në sy të Trumpit.
Ai së pari hodhi idenë për të blerë ishullin gjatë mandatit të tij të parë në 2019. Që nga marrja e detyrës përsëri në janar, Trump ka përsëritur synimin e tij për të marrë territorin.
“Ne kemi nevojë për Grenlandën për sigurinë kombëtare. Në një mënyrë ose në një tjetër do ta arrijmë atë”, tha ai gjatë fjalimit të tij në Kongresin e SHBA javën e kaluar.
Udhëheqësit e Grenlandës dhe Danimarkës i kanë kundërshtuar vazhdimisht kërkesat e tij. Egede e ka bërë të qartë se Grenlanda nuk është në shitje dhe meriton të “trajtohet me respekt”, raporton BBC.
