Grupi i prodhimit të filmit Village Roadshow Entertainment, i njohur për seritë e filmave si The Matrix, Joker dhe Ocean’s, ka kërkuar mbrojtje nga falimentimi në SHBA, sipas një kërkese në një gjykatë të Delaware.
Kompania ka fajësuar problemet e saj financiare për një betejë ligjore me partnerin e saj të dikurshëm Warner Bros (WB) dhe një “përpjekje të dështuar dhe të shtrenjtë” për prodhimin e filmave dhe serive të pavarura.
Për të zbutur disa nga problemet e saj financiare, Village Roadshow po propozon të shesë bibliotekën e saj të gjerë të filmave për 365 milionë dollarë, shkruan BBC.
Borxhet e kompanisë vlerësohen të jenë midis 500 milionë dhe 1 miliard dollarë, sipas dokumenteve të gjykatës. Village Roadshow dhe WB kanë prodhuar dhe bashkë-pronësuar dhjetëra filma gjatë viteve, por marrëdhënia mes tyre u prish në fillim të vitit 2022 pas lansimit të filmit të fundit të Matrix – The Matrix Resurrections – në platformën e transmetimit HBO Max, përcjell KosovaPress.
Village Roadshow ka akuzuar WB se e ka përjashtuar nga të drejtat për vazhdimin e filmave që dy kompanitë kishin prodhuar së bashku më parë.
“Arbitrazhi me WB ka bërë që kompania të ngarkojë mbi 18 milionë dollarë tarifa ligjore, shumica e të cilave mbeten të papaguara”, tha Keith Maib, oficer i riorganizimit të kompanisë, në një kërkesë gjyqësore.
Sipas Maib, kjo betejë ligjore ka “shkatërruar në mënyrë të pakthyeshme marrëdhënien e punës” mes dy kompanive, duke përfunduar në “nexusin më fitimprurës” për suksesin historik të Village Roadshow.
Problemi tjetër me të cilin u përball Village Roadshow ishte një biznes i shtrenjtë studiosh të nisur në vitin 2018. Asnjë nga filmat ose seritë e prodhuara në mënyrë të pavarur si pjesë e kësaj përpjekjeje nuk ka sjellë fitime.
Si shumë kompani të tjera filmi në SHBA, Village Roadshow gjithashtu u përball me një rënie të kërkesës për shkak të pandemisë dhe trazirave nga greva e aktorëve dhe shkrimtarëve të Hollivudit, që filloi në maj 2023.
Në dhjetor, Writers Guild of America ndaloi anëtarët e saj të punonin me Village Roadshow për shkak të dështimit të kompanisë për të paguar kontribuesit e saj.
