Kryedemokrati Sali Berisha u pyet në një dalje televizive se kë sheh ai si pasardhësin e tij në krye të PD apo nëse ka një emër të preferuar.
Berisha u përgjigj se lideri i një partie ka si mision ta çojë forcën që ai drejton te fitorja dhe jo të krijojë pasardhësin e tij.
Për liderin e ardhshëm të PD, kryedemokrati tha se do të respektojë vendimin e anëtarësisë.
Më tej kreu i PD u shpreh se asnjë nga familjarët e tij nuk u përfshi në politikën aktive e për rrjedhojë askush nga familja e tij nuk është kandidat për të drejtuar demokratët.
“Lideri i një force politike ka detyrë dhe mision kryesor ta çojë partinë në fitore dhe jo të krijojë pasardhësin e tij. Nuk është detyrë e asnjë lideri, është e drejta e anëtarëve të partisë. Do të respektoj vendimin e anëtarësisë. Brenda familjes sime nuk ka asnjë kandidat. Vazja ime ndjek politikën nga jeta e saj private. Nuk hyri në listë as të mbyllur as të hapur”, tha Berisha.
