Bashkimi Europian ka këshilluar qytetarët që të grumbullojnë ushqim, ujë të pijshëm dhe sende të tjera thelbësore që do të mjaftonin për 72 orë, si pjesë e një strategjie që synon të rrisë gatishmërinë për përmbytjet, zjarret katastrofike, pandemitë dhe sulmet ushtarake.
Në dokumentin e publikuar, theksohet nevoja për përgatitje ndaj krizave të mëdha, ndërsektoriale, duke përfshirë edhe mundësinë e agresionit të armatosur që mund të prekë një ose më shumë shtete anëtare. Strategjia, e cila frymëzohet nga planet e Gjermanisë dhe vendeve nordike, synon të inkurajojë qytetarët që të ndërmarrin masa proaktive, si zhvillimi i planeve emergjente familjare dhe grumbullimi i furnizimeve bazë.
Hadja Lahbib, komisionerja evropiane për përgatitjen dhe menaxhimin e krizave, deklaroi: “Ne po u themi vendeve anëtare se 72 orë vetë-mjaftueshmëri është ajo që ne rekomandojmë”. Në një video të publikuar në rrjetet e saj sociale, ajo tregoi një çantë emergjence të papërshkueshme nga uji, në të cilën kishte vendosur dokumentet e identitetit, ushqime të konservuara, ujë, shkrepëse, një thikë zvicerane, para cash, ilaçe dhe një radio të vogël.
Strategjia e re e BE-së synon të forcojë koordinimin dhe ndërgjegjësimin publik në lidhje me rreziqet potenciale, përfshirë motin ekstrem të shkaktuar nga ndryshimet klimatike, pandemitë, sulmet kibernetike dhe pushtimet ushtarake.
