Banorët e Evropës dhe pjesëve të tjera të Hemisferës Veriore shijuan një eklips të pjesshëm diellor të shtunën.
Një eklips diellor ndodh kur Hëna kalon përballë atij ylli dhe bllokon dritën e tij. Është një ngjarje e veçantë astronomike për të cilën pozicionet e Diellit, Hënës dhe Tokës duhet të rreshtohen, shkruan BBC.
Një eklips i pjesshëm, siç është ai i dukshëm sot, i referohet fenomenit kur sateliti i Tokës fsheh vetëm një pjesë të Diellit.
Edhe pse eklipsi ishte vetëm i pjesshëm, ekspertët paralajmëruan evropianët që ta vëzhgonin atë me kujdes – shërbimi meteorologjik gjerman paralajmëroi veçanërisht kundër vëzhgimit me dylbi ose teleskopë dhe këshilloi përdorimin e syzeve speciale.
Banorët e parë që do ta shohin atë do të jenë banorët e Mauritanisë dhe Marokut, dhe të fundit ata të Siberisë veriore.
Eklipsi zgjati nga ora 10 e mëngjesit deri në orën 14:00. Observatori i Parisit tha se ai arriti maksimumin e tij në orën 11:47 të mëngjesit, mbi Kanadanë verilindore dhe Grenlandën.
Eklipsi nuk do të jetë i plotë askund, por në disa pjesë të Kanadasë Hëna mbuloi rreth 90 për qind të Diellit, raporton Guardian, përcjell KosovaPress.
Mediat gjermane raportojnë se eklipsi tjetër i pjesshëm mbi Evropën Qendrore do të jetë më 12 gusht të vitit të ardhshëm, kur më shumë se 80 për qind e Diellit do të mbulohet. Eklipsi tjetër total nuk pritet deri në vitin 2081.
Observatori i Zagrebit njoftoi më herët të shtunën se eklipsi i pjesshëm mund të shihet edhe në Kroaci, por vetëm deri në 12 për qind. Nisur nga moti me shi që ka përfshirë pjesën më të madhe të vendit, kroatëve këtë herë eklipsi i pjesshëm u ka shpëtuar.
