Seanca e parë e legjislaturës së re në Kuvendin e Kosovës pritet të shërbejë jo vetëm për betimin e deputetëve dhe zgjedhjen e kryeparlamentarit, por edhe për votimin e qeverisë së re. Këtë synim e ka konfirmuar kryeministri në detyrë, Albin Kurti, gjatë një vizite te kreu i Bashkësisë Islame të Kosovës, Naim Tërnava, me rastin e festës së Fitër Bajramit.
Ndërkohë, Kurti ka humbur një aleat të mundshëm për formimin e qeverisë. Lidhja Demokratike e Kosovës (LDK) ka bërë të qartë se nuk do të bashkëpunojë me Vetëvendosjen (VV) për krijimin e ekzekutivit.
“Lidhja Demokratike e Kosovës nuk do të bëhet pjesë e një bashkëpunimi me Vetëvendosjen. Ne kemi bashkëpunim me partitë e tjera të opozitës, si AAK dhe NISMA, si dhe me grupe të vogla parlamentare,” deklaroi nënkryetari i LDK-së, Lutfi Haziri.
Sipas tij, Kosova rrezikon më shumë të hyjë në një krizë politike sesa të arrijë një marrëveshje për qeverinë e re. Procesi i negociatave mes partive do të jetë vendimtar për të ardhmen politike të vendit.
Ndërkohë, Partia Demokratike e Kosovës (PDK), e cila fitoi 24 mandate në zgjedhjet e fundit, nuk ka vendosur ende për qëndrimin e saj ndaj qeverisë së re. Bedri Hamza, përfaqësues i PDK-së, deklaroi këtë javë se partia e tij nuk ka vija të kuqe për bashkëpunime, duke lënë të hapur mundësinë e negociatave.
Një nga sfidat e para në Kuvend do të jetë zgjedhja e kryetarit të ri të Kuvendit, një post që i takon Vetëvendosjes. Megjithatë, sfida më e madhe mbetet formimi i qeverisë dhe gjetja e aleatëve të duhur për të siguruar shumicën parlamentare.
Përveç këtyre çështjeve, vitin e ardhshëm Kosova do të duhet të zgjedhë edhe presidentin e ri, një tjetër proces që mund të ndikojë në negociatat politike mes partive.
