Faik Basha, ekspert në fushën e sigurisë, shprehu shqetësimin e tij lidhur me reagimin e vendeve të Bashkimit Evropian dhe të Shqipërisë për situatën e krijuar nga lufta në Ukrainë dhe pasojat që mund të ketë kjo për sigurinë ndërkombëtare.
Basha shtoi se shqiptarët e morën situatën shumë seriozisht, më seriozisht se disa vende të BE-së, të cilat nuk e kishin parë fillimin e një lufte konkrete si një kërcënim të drejtpërdrejtë për Shqipërinë. Disa prej tyre e kishin minimizuar rrezikun, duke thënë se nuk kishin frikë nga lufta dhe se nuk kishin çfarë të humbnin.
“Pasi ka dalë zyrtari i BE për emergjencat dhe ka nxjerrë paketën e ndihmës dhe demonstrimin e saj, kisha dy komunikime me mediat për të sqaruar dhe për të dhënë mendime se çfarë duhet bërë dhe ka pasur një interes të jashtëzakonshëm për të pyetur se çfarë ka ndodhur. E kanë marrë shumë seriozisht shqiptarët e kanë marrë më seriozisht se europianë. Pjesa më e madhe e shqiptarëve kishin interes për të parë se si do të vijojë dhe kërkonin informacion më tej.
Vendet e BE nuk e kishin ndjerë shumë. Nuk e kanë parë si një kërcënim serioz fillimin e një lufte konkrete dhe beteje reale në Shqipëri. Një pjesë e marrin me tallje duke theksuar se ne nuk kemi frikë nga lufta, nuk kemi çfarë humbim nga lufta”, tha Basha.
Ai theksoi gjithashtu se gjeopolitika ishte tronditur dhe shumë shtete, përfshirë Shqipërinë, kishin menduar se Neni 5 i Traktatit të NATO-s, i cili garanton mbrojtjen e një shteti anëtar në rast sulmi, do t’i vinte në ndihmë në rast rreziku, mendim të cilin eksperti e hedh poshtë.
“Gjeopolikta është e tronditur dhe vendet nuk janë më të sigurta. Shumë nga shtetet përfshirë dhe Shqipërinë, kanë menduar që neni 5 do ti vijë në ndihmë një vendi në rast rreziku dhe nuk është e vërtetë. Janë masat e marra për tu përgatitur për të qenë i gatshëm.
Sipas gjykimit tim, BE në tërësi nuk i ka ndjekur politikat në drejtim të sigurisë, ka patur problematika, sepse fokusi ka qenë tek ekonomia dhe nuk e ka parë si rrezik çështjen e sigurisë. Lufta në Ukrainë dhe lëvizja politike e SHBA-ve, i dha një goditje të gjithë ekuilibrit të sigurisë botërore, këtu fillon problemi”, tha eksperti i sigurisë.
