Ish-kongresisti amerikan dhe ish-kreu i Ligës Shqiptaro-Amerikane, Joe DioGuardi, ka bërë një gjest të jashtëzakonshëm duke dhuruar bibliotekën e tij personale për Bibliotekën Presidenciale “Ibrahim Rugova” në Prishtinë.
Lajmi është bërë i ditur nga kryetari i Prishtinës, Përparim Rama, i cili e ka vlerësuar këtë akt si një dëshmi të përkushtimit të pandërprerë të DioGuardit për çështjen shqiptare.
“Ky akt i jashtëzakonshëm është vazhdim i angazhimit të tij të palodhur për çështjen shqiptare dhe përkushtimit të tij në mbështetje të popullit shqiptar. Ai edhe njëherë dëshmoi se dashuria për shqiptarët nuk është një periudhë kalimtare, por një angazhim i vazhdueshëm, që shkon përtej kufijve dhe kohëve”, ka shkruar Rama në postimin e tij.
Ai ka shtuar se kjo trashëgimi do të mbetet gjithmonë në zemrat dhe kujtesën e popullit shqiptar, duke falënderuar thellësisht DioGuardin për këtë kontribut të veçantë.
Joe DioGuardi është një prej figurave më të njohura në përkrahjen e shqiptarëve në arenën ndërkombëtare, sidomos gjatë periudhës së luftës dhe pasluftës në Kosovë.
Dhurimi i bibliotekës së tij për bibliotekën që mban emrin e presidentit historik të Kosovës, Ibrahim Rugova, konsiderohet si një simbol i fuqishëm i miqësisë së qëndrueshme shqiptaro-amerikane.
