Dy protesta qytetare janë paralajmëruar sot në Koçan, pas tragjedisë së rëndë në diskotekën Pulse, ku një zjarr mori jetët e shumë njerëzve.
Protestat organizohen nga qytetarët, të cilët kërkojnë drejtësi dhe reagim më të shpejtë nga institucionet për këtë ngjarje tragjike.
Në orën 12:05, familjarët e viktimave të zjarrit tragjik do të organizojnë një marsh proteste nën moton “Marsh për Engjëjt”, si simbol i reagimit të vonuar institucional.
Marshimi do të nisë nga Parku i Revolucionit, dhe më pas qytetarët do të drejtohen në Qendrën Tregtare, duke kaluar përpara institucioneve si Komuna e Koçanit, Stacioni Policor, Gjykata Themelore, dhe Prokuroria.
Në orën 15:59, një protestë tjetër do të mbahet nën moton “Profiti juaj – jetët tona”, ku ky marsh do të ketë një rrugë të ngjashme, duke kaluar po ashtu përpara institucioneve përgjegjëse për trajtimin e kësaj tragjedie.
Ndërkaq, në njoftimin e publikuar në rrjetet sociale, nuk është përmendur kush është organizatori i këtij marshimi.
