Në një periudhë të vështirë, ku kostoja e jetesës rëndon mbi shtresat më të prekura, pensionistët në Durrës kanë filluar të marrin bonusin e pranverës, si një formë mbështetjeje nga qeveria.
Kjo ndihmë është mirëpritur nga të moshuarit, por shumica prej tyre theksojnë se, përballë çmimeve të larta dhe pensioneve të ulëta, kjo shumë mbetet simbolike dhe nuk mjafton për të mbuluar nevojat bazë të muajit.
“Po ç’të më mjaftojë unë? Pension familjar kam e shkreta, e kam të burrit që ka vdekur. Megjithatë, aq sa të jetë, më del s’më del, s’kam ç’të bëj”, thotë një e moshuar.
“Po ta japin bonusin për çdo muaj mirë jemi. Unë kam 80 mijë lekë. Të më japin dhe 100 mijë lekë a 50, të shtyjmë, të blejmë me hëngër. Shkojmë në treg, nuk blejmë asgjë”, shprehet një tjetër.
Ndërsa disa të tjerë shprehin nevojën për një bonus të vazhdueshëm, i cili do të ndihmonte më shumë për t’u përballur me vështirësitë e përditshme.
Në Shqipëri, shumica e pensionistëve jetojnë me të ardhura nën mesataren mujore të shpenzimeve bazë, duke përballuar sfida të mëdha për të mbijetuar. Bonusi i pranverës, megjithatë, mbetet një ndihmë e përkohshme, por rritja e pensioneve dhe politikat sociale më të qëndrueshme mbeten kërkesat kryesore të qytetarëve.
