Aktori Kyle Allen është emri që ka tërhequr vëmendjen e miliona shikuesve javët e fundit, falë rolit të tij si Brad në filmin e ri të Netflix, “The Life List”.
Me një histori prekëse që ka prekur audiencën në mënyrë të pazakontë, filmi ka frymëzuar shumë njerëz që të rishikojnë jetën e tyre, të largohen nga marrëdhënie të dëmshme apo të lënë punët që nuk i bëjnë të lumtur.
Filmi ndjek rrugëtimin e një avokati që ndihmon një të re (luajtur nga Sofia Carson) të realizojë listën e saj të dëshirave në jetë — një rrëfim emocional që i dha Kyle Allen një rol që pritet të jetë një pikë kyçe në karrierën e tij.
Kyle Allen ka lindur në vitin 1994 në Los Angeles. Përpara se t’i përkushtohej aktrimit, ai ishte i përfshirë thellësisht në akrobatikë dhe balet klasik, duke u trajnuar në Kirov Academy of Ballet në Uashington. Pasioni për artin skenik nuk ishte i ri për të – qysh si fëmijë ishte i magjepsur nga filmat dhe televizori, ndërsa si adoleshent u dashurua me teatrin, duke filluar me pjesëmarrje në produksione lokale.
Aftësitë e tij u vunë re shpejt nga agjenci të industrisë së filmit, duke e çuar drejt projekteve televizive dhe kinematografike.
Roli që e bëri të njihej më gjerësisht ishte në serialin The Path në vitin 2018, ku ai luajti përkrah emrave si Aaron Paul dhe Michelle Monaghan. Personazhi i tij, i ndërlikuar dhe me dilema shpirtërore, u vlerësua për thellësinë dhe natyrshmërinë që Kyle solli në ekran. Po atë vit, ai u shfaq edhe në serialin kult American Horror Story: Apocalypse, në rolin e Timothy Campbell.
Debutimi në film e pati në vitin 2016 me filmin 1 Night, por momenti i madh në kinematografi erdhi me rolin e Balkan, anëtar i bandës Jets, në filmin e famshëm muzikor West Side Story të Steven Spielberg, në vitin 2021.
Në të njëjtin vit, ai interpretoi rolin kryesor në komedinë romantike me temë shkencore The Map of Tiny Perfect Things. Vitin pasues, në 2022, u shfaq në disa projekte të mëdha: Skyler në dramën romantike The In Between, Romeo në Rosaline – një interpretim modern i klasikës së Shekspirit, si dhe në filmin The Greatest Beer Run Ever, përkrah Zac Efron dhe Russell Crowe.
Përveç talentit në aktrim, Kyle Allen është shumë aktiv edhe në rrjetet sociale, ku ndan momente nga jeta e tij, përfshirë dashurinë për udhëtimet dhe sportin. Pavarësisht se është në fillim të karrierës së tij, ai ka ndërtuar tashmë një bazë të madhe fansash që e mbështesin në çdo hap.
Ndryshe nga transparenca që tregon për karrierën, jeta personale e Kyle mbetet diskrete. Deri më tani, ai konsiderohet beqar dhe nuk ka pasur raportime zyrtare për lidhje romantike. Përfoljet për një romancë të mundshme me aktoren Joey King, gjatë xhirimeve të The In Between, janë mohuar nga të dy.
Me përformancën e fundit në The Life List, shumë kritikë dhe fansa mendojnë se Kyle Allen është në prag të një shpërthimi të madh në Hollywood — një emër që do ta dëgjojmë gjithnjë e më shpesh në vitet në vijim.
