Bullgaria ka marrë zyrtarisht sot në shërbim avionin e saj të parë luftarak F-16 Block 70.
Ceremonia u mbajt në bazën ajrore të tretë Graf Ignatievo, raporton Anadolu Agency.
Në këtë aktivitet morën pjesë ministri bullgar i mbrojtjes Atanas Zaprjanov, shefi i shtabit të përgjithshëm, admirali Emil Eftimov, zëvendësndihmës sekretari i mbrojtjes i SHBA për NATO-n dhe Çështjet Evropiane, David Baker, ambasadorja në detyrë e SHBA-së në Bullgari Susan Falatko dhe kryeshefi ekzekutiv i Lockheed Martin, Michael Shoemaker.
Ai është një nga dy avionët e dorëzuar nga SHBA në Bullgari si pjesë e një marrëveshjeje më të gjerë të mbrojtjes. Një total prej 16 avionësh F-16 Block 70 do të dorëzohen, sipas dy kontratave të nënshkruara në 2019 dhe 2022. Ata po zëvendësojnë MiG-të sovjetikë.
Modeli F-16 Block 70 është i pajisur me një radar të avancuar, një sistem automatik të shmangies së përplasjes në tokë dhe ekran të përmirësuar të kabinës. Pajisja mundëson kryerjen efektive të misioneve ajër-ajër dhe ajër-tokë dhe hyrja e saj në flotë e afron më tej Bullgarinë me standardet e NATO-s.
Ministri Zaprjanov tha se F-16-i i tretë tashmë është përfunduar, por do të mbetet në fabrikën Lockheed Martin në SHBA derisa pilotët bullgarë të përfundojnë trajnimin e tyre.
Avionët e rinj luftarakë F-16 Viper po zëvendësojnë gradualisht avionët e vjetruar sovjetikë MiG-29 Fulcrum, të cilët deri më tani kanë përbërë pjesën më të madhe të aviacionit luftarak të Bullgarisë.
Pesë avionë të tjerë janë aktualisht në ndërtim, dhe të tetë nga kontrata e parë e vitit 2019 pritet të dorëzohen deri në fund të vitit 2025. Kontrata e dytë nga viti 2022 përfshin tetë F-16 shtesë, të cilët pritet të dorëzohen deri në fund të 2027.
F-16 Block 70 i përket gjeneratës së katërt të avionëve luftarakë me shumë funksione, ndërsa MiG-29 dhe Su-25 bullgar tashmë janë vlerësuar si të vjetruar dhe të kufizuar në aftësi luftarake.
0rvyzl