Në mëngjesin e hershëm në shtëpinë e Penn Badgley, aktori i njohur nga seriali “You”, është kaosi i zakonshëm që vjen me një familje të re, shkruan The Guardian.
Ai është në shtëpinë e tij në New York, duke u përgatitur të flasë për vrasje dhe manipulim, ndërkohë që ndihmon gruan e tij të shtatzënë me binjakë dhe katërvjeçarin e tyre. Badgley ka reflektuar gjatë mbi rolin e Joe Goldberg, personazhi që ka interpretuar për pesë sezone në këtë serial të njohur. Ai shprehet se ky personazh, që përshkruan një njeri manipulues dhe të paaftë për të formuar lidhje të shëndetshme, ka ndikuar shumë në jetën e tij personale, duke e shtyrë të reflektojë mbi dashurinë, maskulinitetin dhe atë që do të thotë të jesh burrë dhe baba, raporton KosovaPress.
Badgley, i cili është tani 39 vjeç, tregon se roli i Goldberg ka pasur një ndikim të thellë në jetën e tij, duke e bërë atë të mendojë për pasojat e mentalitetit toksik dhe abuzues. Ai ka kërkuar gjithashtu që skenat seksuale në filma dhe seriale të trajtohen me më shumë seriozitet dhe kuptim, duke theksuar se shumë herë këto skena përdoren për të eksituar dhe jo për të pasqyruar marrëdhëniet e vërteta dhe të shëndetshme. Duke folur për fundin e serialit, Badgley shprehet se është i lumtur që ky cikël po mbyllet, duke shtuar se është i gatshëm të ndihmojë shoqërinë të përballet me tema më të rëndësishme, si dhuna dhe keqtrajtimi, që shpesh janë të pranishme në botën e mediave.
Në përfundim të serialit, ai shpreson që Goldberg të ketë marrë një përfundim të drejtë, duke reflektuar mbi atë që do të thotë të jesh një njeri i mirë dhe përgjegjës.
Sezoni i fundit i “You” do të shfaqet në Netflix më 24 Prill.
