Ballina Sport Tragjedia: Ndërron jetë në fushë futbollisti Bledar Hajdari

Tragjedia: Ndërron jetë në fushë futbollisti Bledar Hajdari

47
0

Një tjetër ngjarje tragjike ka goditur futbollin shqiptar. Futbollisti Bledar Hajdari, pjesë e skuadrës së FC Dajtit, ka humbur jetën si pasojë e një atak kardiak gjatë një ndeshjeje të kampionatit amator “FSHF Sunday League Albania”, që po luhej në ambientet e “Shtëpisë së Futbollit”.

Ngjarja e rëndë ndodhi mbrëmjen e djeshme, gjatë sfidës mes FC Dajtit dhe FC Lumninese, kur Hajdari u rrëzua papritur në fushë.

Ndihma e parë iu dha menjëherë dhe ambulanca e pranishme në stadium e transportoi me urgjencë drejt Spitalit të Traumës. Por, pavarësisht përpjekjeve të stafit mjekësor, i riu nuk mundi të mbijetonte.

Federata Shqiptare e Futbollit (FSHF) reagoi ndaj humbjes së papritur, duke shprehur ngushëllimet më të sinqerta për familjen Hajdari dhe ekipin e FC Dajtit. “

Reagimi i plotë:

Federata e Futbollit shpreh tronditjen e thellë për ngjarjen tragjike të ndodhur sot gjatë ndeshjes së vlefshme për gjysmëfinalet e kampionatit të futbollit amator 9×9 “FSHF Sunday League Albania”, FC Dajti-FC Lumninese në Shtëpinë e Futbollit .

Gjatë ndeshjes futbollisti i FC Dajtit, Bledar Hajdari, ka shfaqur probleme shëndetësore dhe është rrëzuar në fushën e lojës.

Menjëherë i është dhënë ndihma e shpejtë, duke e transportuar urgjentisht me ambulancën e pranishme në ndeshje për në spitalin e Traumës.

Për fat të keq, pavarësisht asistencës mjekësore dhe të gjitha përpjekjeve për ta rikthyer në jetë, futbollisti ka ndërruar jetë.

FSHF i shpreh ngushëllimet më të thella familjes Hajdari dhe ekipit të FC Dajtit për këtë humbje të madhe që ka shokuar të gjithë komunitetin e futbollit shqiptar.

Në këto momente të vështira, Federata Shqiptare e Futbollit qëndron pranë familjes, miqve dhe bashkëlojtarëve të Bledar Hajdarit, duke ndarë me ta pikëllimin për këtë ndarje të parakohshme dhe të rëndë.

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu