Kryeministrja Giorgia Meloni ndodhet në Shtëpinë e Bardhë për një takim dypalësh me presidentin amerikan Donald Trump. Sipas informacioneve të publikuara nga Shtëpia e Bardhë me axhendën ditore të presidentit, dy liderët do të drekojnë së bashku përpara takimit.
Giorgia Meloni ka “një rol kyç” në Evropë, u tha gazetarëve një zyrtar i administratës Trump në një telefonatë përpara takimit. “Ne e shohim atë si një bashkëbiseduese të vlefshme për Komisionin Evropian”, shtoi ai, duke nënvizuar marrëdhëniet historike midis Italisë dhe Shteteve të Bashkuara. Kryeministrja mund të përfaqësojë një “urë” në negociatat tregtare në vazhdim midis Shteteve të Bashkuara dhe Bashkimit Evropian dhe ka një marrëdhënie “shumë të veçantë” me Trump, shpjegoi zyrtari. Trump dhe Meloni do të punojnë së bashku për t’i dhënë fund luftës në Ukrainë, shtoi ai, duke specifikuar se të dy liderët do të diskutojnë gjithashtu mundësitë për të promovuar bashkëpunimin në hapësirë dhe zhvillimin e teknologjive kritike.
Trump, vazhdoi zyrtari, do të komunikojë “pritshmëritë e tij për Italinë dhe Evropën” gjatë takimit dypalësh. “Ai do të përsërisë pritshmëritë e tij për t’i bërë ata partnerë të mirë tregtarë për SHBA-në: gjithashtu për çështje të tilla si taksat, pasi disa ligje italiane penalizojnë kompanitë amerikane,” shpjegoi ai, duke marrë si shembull taksën për shërbimet dixhitale.
Sipas gazetës britanike “Financial Times”, Meloni, e cilësuar nga Trump si “një grua e mrekullueshme”, mund të ndihmojë në sqarimin e kërkesave të SHBA-së në lidhje me tarifat, të cilat ende nuk janë bërë të qarta për negociatorët evropianë. Trump shkroi në Social Truth se “çdo vend, përfshirë Kinën, dëshiron të takohet me ne. Dhe sot është radha e Italisë. Dje pata një bisedë shumë produktive me presidenten e Meksikës (Claudia Sheinbaum). Në të njëjtën kohë u takova me zyrtarë të lartë të tregtisë nga Japonia. Ishte një takim shumë produktiv. Çdo vend, përfshirë Kinën, dëshiron të përfundojë, sot Trump, do të takohet me ne”.
