Interi i Milanos ka nisur tashmë të formësojë skuadrën për sezonin e ardhshëm, dhe një nga hapat e parë do të jetë një revolucion i madh në repartin ofensiv.
Me Lautaro Martínez dhe Marcus Thuram si të vetmit sulmues të garantuar për të qëndruar, pjesa tjetër e repartit të avancuar pritet të largohet nga “Giuseppe Meazza”.
Sipas *Calciomercato*, klubi ka vendosur të ndërpresë bashkëpunimin me Joaquín Correa, Mehdi Taremi dhe Marko Arnautoviq.
Performanca nën pritshmëri e këtij treshi ka qenë një nga arsyet kryesore për vështirësitë e skuadrës në momentet vendimtare të sezonit.
Taremi, për shembull, erdhi me pritshmëri të larta pas aventurës së suksesshme te Porto, por ka shënuar vetëm tre gola – shumë më pak nga sa pritej. Correa, nga ana tjetër, ka zhgënjyer sërish me vetëm një gol dhe një ndikim gjithnjë e më të vogël.
Sa i përket Arnautovic, ndonëse ka kontribuar më shumë (shtatë gola), mosha dhe mungesa e vazhdimësisë kanë bërë që drejtuesit sportivë të mos e përfshijnë në planet për të ardhmen.
Interi, i cili nuk arriti të përmbushte ëndrrën për një tripletë historike, e pagoi shtrenjtë mungesën e besueshmërisë nga lojtarët rezervë.
Për këtë arsye, po konsiderohet një ristrukturim i plotë i sulmit gjatë merkatos së verës. Largimi i këtyre tre lojtarëve do të jetë një nga hapat e parë që do të përcaktojë drejtimin e ri të klubit. Epoka e “shanseve të dyta” duket se ka marrë fund në Viale della Liberazione.
