Liga Premier ka lëshuar një deklaratë zyrtare pasi Manchester City fitoi betejën ligjore sa i përket rregullave të sponsorizimit (APT).
City nisi një veprim ligjor ndaj Ligës Premier në qershor të vitit të kaluar, duke pretenduar se ata ishin viktimë e ‘diskriminimit’ sa i përket rregullave.
Rregullat e APT-së nënvizojnë se marrëveshjet tregtare që përfshijnë klubet duhet të vlerësohen për t’u siguruar se kanë një vlerë të drejtë të tregut.
Në tetor, një panel i pavarur gjeti disa elemente të rregullave ekzistuese duke i cilësuar ato si ‘të paligjshme’, me Daily Mail që raportoi se City ka fituar shtatë argumente të tyre kyçe, por shumë tjera prej tyre u refuzuan.
Liga Premier kishte konfirmuar se ata do të propozojnë ndryshime të reja të rregullave, të cilat u votuan nga klubet e elitës së futbollit anglez në nëntor.
City votoi kundër dhe nisi një veprim të ri ligjor mbi ndryshimet e reja gjatë janarit.
Një panel i pavarur mori vendim të premten se rregullat e mëparshme të APT-së ishin ‘të paligjshme, të pavlefshme dhe të pazbatueshme’.
Tani, Liga Premier ka lëshuar një njoftim nga ana e tyre sa i përket kësaj çështje.
“Ky vendim shprehimisht nuk ndikon në funksionimin e vlefshëm të rregullave të reja. Gjykata nuk ka bërë asnjë konkluzion në lidhje me vlefshmërinë edhe efektivitetin e rregullave”.
“Liga vazhdon të besojë se rregullat e reja të APT janë të vlefshme dhe të zbatueshme dhe po bën presion për një zgjidhje të shpejtë të kësaj çështjeje”.
“Rregullat e reja të APT janë në fuqi të plotë dhe klubeve u kërkohet të respektojnë të gjitha aspektet e sistemit, duke përfshirë dorëzimin e huave në Ligën Premier, për vlerësimin e vlerës së drejtë të tregut”, thuhej në njoftimin e Ligës Premier.
