Kreu i ekstremit të djathtë në Rumani, Călin Georgescu, është arrestuar nga policia si pjesë e një hetimi nga prokurorët për mashtrim në fushatën zgjedhore, ku ai fitoi raundin e parë të zgjedhjeve presidenciale të vitit të kaluar.
Sipas BBC, mësohet se Georgescu u ndalua në kryeqytetin Bukuresht, këtë të mërkurën.
Mbështetësit e tij thanë se ai do të paraqiste kandidaturën e tij për zgjedhjet e reja në maj, pasi balotazhi i raundit të dytë të dhjetorit të kaluar u anulua nga gjykata kushtetuese.
Dy parti populiste të krahut të djathtë thanë se po mobilizonin mbështetësit e tyre për t’u drejtuar në zyrën e prokurorisë, ku Georgescu u dërgua për t’u marrë në pyetje.
Raportet rumune thanë se policia po ngrinte barriera rreth ndërtesës dhe se dhjetëra demonstrues ishin mbledhur për të protestuar.
Prokurorët kanë bërë një sërë akuzash kundër Georgescu, sipas mediave rumune, duke përfshirë akte kundër rendit kushtetues dhe përfshirje në një organizatë ekstremiste.
Partitë opozitare populiste kishin paraqitur më parë një mocion mosbesimi kundër qeverisë pro-evropiane të zgjedhur në mënyrë demokratike të Rumanisë.
Presidenti në largim i Rumanisë, Klaus Iohannis, dha dorëheqjen këtë muaj përpara një votimi për shkarkimin e shkaktuar nga zgjedhjet e anuluara të dhjetorit. Ai kishte vendosur të qëndronte në detyrë derisa të zgjidhej një pasardhës në maj.
Përpara se raundi i dytë i zgjedhjeve të anulohej në dhjetor, Iohannis deklasifikoi dokumentet e inteligjencës që sugjeronin se qindra llogari të TikTok ishin aktivizuar duke mbështetur Georgescu.
Inteligjenca e jashtme rumune tha se Rusia kishte qenë pas kësaj lëvizjeje, si dhe mijëra sulmeve kibernetike dhe sabotazheve të tjera. Politikanët e opozitës kishin akuzuar në atë kohë Iohannis për një lëvizje jodemokratike dhe ekipi i komunikimit i Georgescu përsëriti pretendimin kundër prokurorëve.
