Pas arrestimit të Ekrem Imamoglu, kryetarit të Stambollit, një turmë e madhe u mblodh para ndërtesës së Bashkisë Metropolitane të Stambollit (IBB) në Sarachane të mërkurën në mbrëmje.
Tubimi u bë si rezultat i thirrjes së bërë nga Ozgur Ozel, kreu i Partisë Popullore Republikane (CHP), shkruajnë mediat e huaja.
Dilek Imamoglu, gruaja e Ekrem Imamoglu, ishte e para që iu drejtua turmës që ishte mbledhur para bashkisë.
Ajo filloi duke falenderuar të gjithë ata që kishin ardhur pavarësisht motit, duke thënë: “Jam mirënjohëse për të gjithë ju që kapërceni pengesat për të qenë këtu sot”.
Ajo theksoi se ndalimi i të shoqit nuk ishte vetëm për të, “por për vullnetin e 16 milionë banorëve të Stambollit, për pensionistët që përfitojnë nga programet sociale, për të rinjtë dhe për të varfërit që janë të shtypur nga qeveria aktuale”.
Dilek vazhdoi: “Sot, ne jemi të gjithë nën paraburgim. Sot, ajo që është nën paraburgim është sundimi i ligjit, drejtësia dhe demokracia. Sot është shpresa për një Turqi paqësore, të lumtur, të drejtë dhe demokratike për 86 milionë qytetarë”.
Njëqind e gjashtë persona u arrestuan në Stamboll të mërkurën si pjesë e tri hetimeve të veçanta.
Midis të arrestuarve janë individë të profilit të lartë si kryetari i bashkisë së Stambollit Ekrem Imamoglu, artisti Ercan Saatci dhe gazetari Ismail Saymaz.
Hetimet mbulojnë çështje të ndryshme, duke përfshirë korrupsionin, terrorizmin dhe protestat e parkut Gezi të vitit 2013.
Ministri turk i Drejtësisë, Yilmaz Tunc deklaroi gjithashtu të mërkurën se prezumimi i pafajësisë derisa të provohet fajësia qëndron në fuqi, duke komentuar: “Le të presim të gjithë me durim rezultatin e hetimit. Procesi gjyqësor do të sqarojë akuzat, mbrojtjen dhe provat dhe e vërteta do të zbulohet në kohën e duhur”
