Një gruaje amerikane iu desh të hiqte veshkën e saj të transplantuar të derrit pas më shumë se katër muajsh, pasi trupi i saj filloi ta refuzonte, gjë që gjithsesi përfaqëson një periudhë rekord të jetës me organin, njoftoi sot spitali që kreu operacionin.
Towana Looney, një 50-vjeçare nga Alabama, kishte një transplantim gjenetikisht të modifikuar të veshkës së derrit në fund të nëntorit, një praktikë që është ende shumë eksperimentale, por ofron shpresë për zgjidhjen e mungesës kronike të organeve.
Heqja e veshkës tregon se sa larg është ende ai synim, por fakti inkurajues është se organi ka përmbushur funksionet e tij për 130 ditë, ose më shumë se katër muaj, që është një rekord. Deri më tani, asnjë pacient nuk ka arritur të mbijetojë më shumë se dy muaj pas një transplantimi të tillë.
“Për herë të parë që nga viti 2016, unë kam qenë në gjendje të shijoj miqtë dhe familjen time dhe të kem kohë, pa pasur nevojë të planifikoj gjithçka rreth trajtimeve të dializës”, tha pacientja në një deklaratë të ndarë nga Spitali NYU Langone në Nju Jork.
Ajo është “shumë mirënjohëse edhe pse rezultati nuk ishte ai që të gjithë kishin shpresuar,” shtuan ata.
Gruaja amerikane i dhuroi një nga veshkat nënës së saj në vitin 1999 dhe ishte në dializë për tetë vjet pasi një ndërlikim shtatzënie i dëmtoi veshkën e mbetur. Në pamundësi për të gjetur një dhurues të përshtatshëm, asaj iu dha leja për të marrë një veshkë të modifikuar gjenetikisht pasi shëndeti i saj u përkeqësua.
Pavarësisht rezultateve fillestare inkurajuese, “në fillim të prillit ajo përjetoi një rënie të funksionit të veshkave për shkak të refuzimit akut”, tha kirurgu i saj, Robert Montgomery.
“Shkaku i këtij episodi refuzimi pas një periudhe të gjatë stabiliteti është nën hetim, por ai pasoi një reduktim të trajtimit imunosupresiv për shkak të trajtimit të një infeksioni që nuk lidhet me veshkën e derrit,” shpjegoi ai.
Vendimi për të hequr organin u mor nga pacientja dhe mjekët e saj për të ruajtur “mundësinë e një transplantimi të ardhshëm”, tha Montgomery.
