Kreu i Grupit parlamentar të Partisë Demokratike së Rithemelimit, Gazment Bardhi ka deklaruar se Apeli duhet t’i japë fund tej zgjatjes së çështjes së logos dhe vulës së PD, pasi Gjykata e Lartë vendosi rishqyrtimin e saj.
Gazment Bardhi shprehet se Gjykata e Apelit duhet t’i japë fund “këtij absurdi që vijon prej dy vitesh dhe që duhet të ishte zgjidhur me vullnet e përgjegjshmëri politike”.
Ai thekson se Partia Demokratike është pronë e anëtarëve të saj dhe çështje e interesit publik, që ndikon në mënyrë të drejtpërdrejtë në jetën institucionale të vendit.
Kreu i Grupit të PD-së deklaroi se çdo zvarritje do të ishte e papranueshme pasi sipas tij dëmton opozitën.
“Pas zbardhjes së vendimit të Gjykata e Lartë për konfliktin e brendshëm ligjor në PD, është e domosdoshme që Gjykata e Apelit menjëherë dhe pa asnjë vonesë të mëtejshme t’i jap fund tej zgjatjes së këtij absurdi që vijon prej dy vitesh dhe që duhet të ishte zgjidhur me vullnet e përgjegjshmëri politike.
PD është pronë e anëtarëve të saj, aset kombëtar, dhe çështje e interesit publik, që ndikon në mënyrë të drejtpërdrejtë në jetën publike, shtetërore, institucionale të vendit. Çdo zvarritje do të ishte e papranueshme, sepse dëmton opozitën dhe përmes saj dëmton Shqipërinë!”, u shpreh Gazment Bardhi.
