Rithemelimi ka bërë 3 propozime të reja në lidhje me amnistinë penale, për të cilën socialistët paralajmëruan një ditë më parë se nëse do të jetë gati të hyrë në seancë e të enjtes do ta miratojnë.
Në bazë të propozimeve të Rithemelimit, gratë të përfitojnë 2 vite ulje dënimi, burrat 1 vit e gjysmë. Një tjetër propozim është që të zgjatet afati i amnistisë deri në 31 mars 2024, ishte deri në 31 janar. Dhe po ashtu kërkohet të mos përfitojnë të dënuarit nga Gjykata e Posaçme.
Miratimi i aministisë kërkon shumicë të cilësuar prej 84 votash.
‘1. Grupi Parlamentar i Partisë Demokratike ka propozuar që të përjashtohen nga vuajtja e dënimit dhe ndjekja penale të gjithë personat e gjykuar apo hetuar për vepra penale të kryera gjatë grumbullimeve dhe manifestimeve të kryera deri në datën 31 Mars 2024, pavarësisht datës së regjistrimit të tyre.
- Grupi Parlamentar i Partisë Demokratike ka propozuar përjashtimin nga amnistimi, qoftë sa i përket vuajtjes së dënimit, uljes së dënimit apo ndjekjes penale, të gjithë funksionarët e lartë të hetuar dhe/ose gjykuar nga strukturat e posaçme antikorrupsion apo që janë subjekt i deklarimit të pasurisë, si deputetë apo kryebashkiakë.
- Grupi Parlamentar i Partisë Demokratike ka propozuar një rritje të masës së përfitimeve nga amnistia, qoftë në drejtim të uljes së dënimit me 2 vite për gratë dhe 1.5 vite për burrat, qoftë në drejtim të datës së dënimit, fillimit të hetimeve apo kryerjes së veprës penale deri në 31 Mars 2024, nga 31 Janari 2024 qê parashikonte versioni aktual i projektligjit.’- njofton Rithemelimi.
