Efektet e ndryshimit të klimës mund të “rruajnë” gjysmë viti nga jeta juaj, paralajmëron një studim i ri.
Rritja e temperaturës dhe reshjeve – dhe problemet e shëndetit publik që vijnë me to – parashikohet të ulin jetëgjatësinë mesatare të njeriut me gjashtë muaj, raportojnë studiuesit në numrin e së enjtes të revistës PLOS Climate, raporton UPI.
“Kërcënimi global i paraqitur nga ndryshimi klimatik për mirëqenien e miliarda njerëzve nënvizon nevojën urgjente për ta trajtuar atë si një krizë të shëndetit publik”, tha studiuesi Amit Roy, profesor i asociuar i ekonomisë në Universitetin e Shkencës dhe Teknologjisë Shahjalal në Bangladesh.
Valët e të nxehtit dhe përmbytjet janë një kërcënim i drejtpërdrejtë për shëndetin e njeriut, por ndryshimi i klimës gjithashtu mund të prodhojë efekte më delikate shëndetësore, të tilla si rritje e sëmundjeve të frymëmarrjes dhe sëmundjeve mendore, thanë studiuesit.
Për të nxjerrë përfundimin se si ndryshimi i klimës mund të ndikojë në jetëgjatësinë, studiuesit vlerësuan të dhënat mesatare të temperaturës, reshjeve dhe jetëgjatësisë për 191 vende nga viti 1940 deri në vitin 2020.
Ata llogaritën se një rritje e temperaturës globale prej 1 gradë Celsius shoqërohet me një ulje prej rreth pesë muajsh dhe një javë në jetëgjatësinë mesatare të njeriut.
Rritja prej 10 pikësh në një indeks të përbërë të ndryshimeve klimatike – duke marrë parasysh temperaturën dhe reshjet – pritet të ulë jetëgjatësinë mesatare me gjashtë muaj, tregojnë rezultatet.
Gratë dhe njerëzit që jetojnë në vendet në zhvillim janë më të këqijat teksa ndodhin ndryshimet klimatike, thanë studiuesit.
Studimet e ardhshme të këtij lloji duhet gjithashtu të vlerësojnë ndikimin e ngjarjeve specifike të rënda të motit, të tilla si zjarret, cunami dhe përmbytjet. Efektet e këtyre ngjarjeve nuk mund të kapen plotësisht duke analizuar vetëm temperaturën dhe reshjet, tha Roy në një njoftim për shtyp.
