Përgjigja e Izraelit ndaj sulmit iranian mund të jetë shumë e afërt. Kështu citohet të ketë thënë një zyrtar i lartë izraelit për median amerikane NBC.
Duke folur pas mbledhjes së kabinetit të luftës së Izraelit për disa orë, zyrtari tha se vendimmarrësit izraelitë besojnë se është e rëndësishme që çdo përgjigje të jetë e koordinuar me Shtetet e Bashkuara të Amerikës.
Gjatë takimit të kabinetit u shqyrtuan disa opsione diplomatike dhe ushtarake, tha zyrtari izraelit. Ministri i Mbrojtjes së Izraelit ka kërkuar krijimin e një aleance strategjike kundër Iranit pas sulmeve të së shtunës.
“Ne kemi një mundësi për të krijuar një aleancë strategjike kundër këtij kërcënimi të rëndë nga Irani, i cili po kërcënon të vendosë eksplozivë bërthamorë me këto raketa, gjë që mund të jetë një kërcënim jashtëzakonisht i rëndë”, tha Yoav Gallant, Ministër i Mbrojtjes së Izraelit.
Gallant ka zbuluar edhe pjesë nga biseda me Sekretarin Amerikan të Mbrojtjes, Lloyd Austin. Për Gallant, Izraeli nuk ka zgjidhje tjetër veçse t’i kundërpërgjigjet sulmit të Iranit.
Por, administrata e Biden dhe disa vende të tjera perëndimore aleate me Izraelin po i kërkojnë qeverisë së Benjamin Netanyahu të mos nxitojë në një hakmarrje kundër Iranit që mund të çojë në një luftë rajonale.
Zëdhënësi i Këshillit të Sigurimit të SHBA-së, John Kirby, konfirmoi qasjen e SHBA-së lënë dorë të lirë Izraelit të veprojë.
“Qeveria izraelite do të vendosë vetë nëse do të ketë një përgjigje ndaj sulmit iranian dhe cila do të jetë përgjigja”, tha Kirby duke nënvizuar se Shtetet e Bashkuara “nuk janë të përfshira në përgjigjen e mundshme” të shtetit hebre.
