Presidenti i Partizanit, Gazment Demi, foli për mediat, pas shortit të “Final Four”, që vendosi kryeqytetasit përballë Skënderbeut.
Demi deklaroi se nuk kishte preferenca, ndërsa shtoi se ashtu si Tirana, edhe Skënderbeu është ekip me traditë, ndërsa shtoi se dëshiron të ndjekin shembullin e korçarëve për në Europë.
“Nuk kisha fare preferenca në short. Do doja që vendi i parë të përballej me të dytin dhe i treti me të katërtin. E kam thënë që në fillim, kjo formula e zhvlerëson kampionatin . Vjet unë nuk isha dakord, por shumica vendosi.
Si Partizan na eci këtë vit. Për ne është një favor më shumë drejt titullit. Tirana mungon gjithmonë, por edhe të tjerët janë me traditë. Skënderbeu është një nga skuadrat që ka ecur më shumë në Europë dhe në duam të ndjekim shembullin e Skënderbeut.
Këtë vit do jetë “Air Albania” i Partizanit, nëse nuk del Tirana. Do jemi të qetë, sigurisht që do ketë tifozë”, u shpreh presidenti i Partizanit Gaz Demi.
Presidenti i Vllaznisë, Alban Xhaferi foli për mediat, pas shortit të “Final Four”, që i vendosi përballë Egnatias.
Xhaferi deklaroi se Vllaznia i ka mundësitë për të shkuar në finale dhe për të fituar titullin kampion, ndërsa kishte edhe një thirrje për tifozët.
“Nuk do e quaja kundërshtar të vështirë, sepse kemi ardhur me meritë deri këtu. Me Egnatian jemi përballur shpesh këtë sezon. Skuadra është e përgatitur. Do bëjë maksimumin për finalen. E respektojmë kundërshtarin, ka lojtarë shumë të mirë.
Vllaznia i ka lojtarët për të synuar titullin. Nuk kam pasur ndonjë preferencë, Të gjitha skuadrat janë të mira dhe e meritojnë “Final Four”. Trajneri aktual, e ka mundësinë për të shkuar në finale. I bëj thirrje tifozëve ta mbushim stadiumin. Do kemi suport nga Shkodra dhe nga tifozët në Tiranë”, u shpreh presidenti i Vllaznise.
Presidenti i Skënderbeut, Ardjan Takaj, foli për mediat, pas shortit të “Final Four”, që i vendosi përballë Partizanit në gjysmëfinale.
Takaj deklaroi se ekipi synon titullin, pas një sezoni shumë të lodhshëm. Gjithashtu, ai zbuloi se kanë mbetur edhe tre vite nga dënimi i UEFA-s.
“Ky ishte një vit i bukur. Bëmë një skuadër me djem të rinj dhe të talentuar. Është diçka e madhe për ne dhe qytetin kjo arritje. Të gjithë investojnë në mënyrat e veta.
Kampionati është një gjë e madhe për ne dhe qytetin e Korçës e do të jemi për ta synuar atë. Bëhet një luftë e madhe. Kemi edhe 3 vite nga dënimi. Këto janë ndeshje finale nuk kanë të bëjë motivimi për këto ndeshje s’do ndonjë gjë të madhe se dihet. Gjithë ky vit i mundimshëm, kurorëzohet në “Air Albania”, theksoi presidenti i Skenderbeut.
Egnatia kryesuese, u vendos përballë Vllaznisë, nga shorti i “Final Four”, për gjysmëfinale.
Pas kësaj, për mediat, foli edhe presidenti i Egnatias, Agim Demrozi, i cili deklaroi se ekipi është ndërtuar për të fituar titullin kampion.
“E prisnim edhe Vllazninë. Nuk ka rëndësi. Me Vllazninë jemi përballur me shumë se me ekipet e tjera këtë vit. T’ia lëmë fushës. Ekipin e kemi bërë për kampion. Formulën e dinim që në fillim të kampionatit, pavarësisht keqardhjes. Do luajmë shanset deri në fund.
Ekipi është krijuar edhe për Kupën dhe për kampion. Kukësi është skuadër shumë e mirë, nuk kanë çfarë të humbasin. Tifozët nuk na kanë paragjykuar, na kanë mbështetur, Tifozët e tjera na shikojnë si qytet i vogël, por nuk jemi ashtu. Jemi mesi i Shqipërisë. Kemi shumë tifozët. Nëse fitojnë, do ketë shpërblime për lojtarët”, deklaroi presidenti i Egnatias.
