Superliga e Arabisë Saudite po sjell në gjirin e saj një numër të madfh lojtarësh cilësorë nga Europa dhe është fjala për kontigjentin që ka spikatur në Europë me klube të mëdha, mes tyre lojtarë të Realit të Madridit, Paris SG, Bajernit të Mynihut, klubeve elitare angleze etj. Synimi i sheikëve arabë ka qenë që ta shndërrojnë ligën e tyre në një nga më të fortat në botë dhe që të jetë në gjendje të konkurrojë superligat europiane nëpërmjet afrimit të lojtarëve që kanë imazh të fuqishëm dhe që sjellin të ardhura të majme nga reklamat. Nga ana tjetër, ambicia e Arabisë Saudite është të organizojë një Kupë Bote dhe për të sjellë vëmendje ndaj futbollit në një vend bërthamë të botës myslimane, si dhe për të rritur influencën e Arabisë Saudite në sport. Parë në këtë kuadër, investimi marramendës financiar është parë si kusht për të arritur tek qëllimi madhor. Falë parave janë afruar emra të mëdhenj si Mane, Benzema, Nejmar e shumë e shumë të tjerë, por ditët e fundit Karim Benzema ka shfaqur shenja pakënaqësie dhe sipas mediave serioze ka kërkuar të largohet dhe për të flitet se dëshiron të rikthehet tek Reali i Madridit. Në fakt, me përjashtimin e një largimi nga Arabia Saudite, opsionet e Karim Benzema për t’u larguar nga Al-Ittihad këtë muaj janë të kufizuara. Sipas “L’Equipe”, diskutimet për dërgimin e francezit në një klub tjetër saudit janë duke vazhduar. Në fillim të këtij muaji, “AFP” raportoi se Benzema kishte kërkuar të largohej nga Al-Ittihad, vetëm disa muaj pasi mbërriti si futbollist i lirë nga Real Madridi. Ndërsa përfaqësuesit e 36-vjeçarit i kanë mohuar raportet, emrat e klubeve të interesuara filluan të qarkullojnë, mes tyre Lioni, Mançester Junajtid, Çelsi e Arsenali. Megjithatë, autoritetet e Arabisë Saudite duan të pengojnë me çdo kusht rikthimin e tij në Evropë, pasi vlerësojnë një veprim që do të dëmtonte imazhin e Superligës saudite. Me vetëm tetë ditë deri në rifillimin e sezonit në shtetin e Gjirit, “L’Equipe” raporton se negociatat për të transferuar fituesin e “Topit të Artë” në një klub tjetër saudit janë duke u zhvilluar. Identiteti i klubit nuk është bërë i ditur. Megjithatë, Al-Itihad duhet së pari t’i japë dritën jeshile lëvizjes, të cilën ata ende nuk e kanë bërë. Mbetet të shihet në 3-4 ditët e ardhshme nëse Benzema do ta pranojë ofertën e sauditëve apo do të marrë vendim final për t’u kthyer në Europë. Gjasat janë që Benzema të marrë një ofertë për rritje page dhe kalimin në një klub që ofron më shumë si nga ana financiare por mund të ketë edhe pretendime për trofe.
