Italiani Marco Romeo ka dëshmuar përpara një gjykate në Spanjë në lidhje me vrasjen e ish-të dashurës së tij, shqiptares Sibora Gagani.
Krimi monstruoz tronditi opinionin publik, pasi shqiptarja 22-vjeçare u gjet e murosur. Sibora ishte zhdukur që në vitin 2014.
Pasi ishte arrestuar për një vrasje tjetër, italiani rrëfeu se trupi i Siborës ndodhej i murosur.
Por në dëshminë e tij, ai ka dhënë se Siborën e vrau mafia shqiptare. Përpara gjykatës, ai tha se ajo kishte marrë 25 mijë euro borxh nga bashkëkombasit e saj për të ngritur një biznes.
Por paratë iu vodhën nga disa kolumbianë dhe ajo nuk mund të paguante borxhin. Italiani tha se ishin katër shqiptarë që e vranë Siborën dhe e urdhëruan atë që të hiqte qafe trupin.
Ai tha se di emrin e njërit prej autorëve të krimit, por refuzoi që ta tregonte përpara gjykatës. Marco tha se i vjen keq për atë që ka ndodhur, por shtoi se e fshehu trupin nga frika. Italiani tha se ka reflektuar për atë që ka ndodhur dhe kërkoi mëshirë.
