Raketa Falcon 9 e SpaceX pritet që gjatë javës të lëshojë në hapësirë satelitin PACE të NASA-s i cili do të ndihmojë shkencëtarët të vlerësojnë gjendjen e oqeaneve në mbarë botën.
Falcon 9 do të dërgojë satelitin në një orbitë 677 kilometra larg nga Toka, rreth 70 për qind më lart se fluturimet e tjera të Stacionit Ndërkombëtar Hapësinor.
PACE do të përdorë instrumente shkencore për të mbledhur të dhëna që mund të përcaktojnë ngjyrën e oqeanit, kanë njoftuar zyrtarët e NASA-s.
“Matja e sasisë së dritës dhe përcaktimi i ngjyrës do t’i ndihmojë shkencëtarët të kuptojnë më mirë vendndodhjet e algave mikroskopike, të cilat janë jetike për shëndetin e oqeaneve të Tokës dhe jetën e saj detare”, shtuan ata.
Bëhet e ditur se, nëse gjithçka shkon sipas planit, sateliti PACE 3.2 metra i gjatë do të monitorojë oqeanet për tre vite.
Por, rruga e tij drejt nisjes ka qenë mjaft e mundimshme.
Administrata Trump është përpjekur ta anulojë misionin, por Kongresi ndau fondet e kërkuara për nisjen e tij.
Në vitin 2014, NASA e kufizoi koston totale të PACE në 805 milionë dollarë (744,906,750 euro). Megjithatë, ky çmim është rritur në 948 milionë dollarë (877,231,800 euro).
Ndryshe, kjo nisje është pjesë e një viti shumë të ngarkuar për SpaceX. Kompania ka nisur 10 misione orbitale vetëm gjatë muajit janar, ritëm ky i cili synon të rritet.
