Bëri shumë bujë në media fakti që klasikja e futbollit shqiptar do të zhvillohej në stadiumin “Roza Haxhiu” të Lushnjës. Ndërsa në fushën e blertë, sfida mes Tiranës dhe Vllaznisë nuk kishte shumë histori, pasi shkodranët fitojnë takimin me rezultatin 4-2.
Shkodranët zgjidhin shumë shpejt ndeshjen dhe brenda 34 minutave të para e shohin veten në avantazh të trefishtë. Balaj zhbllokon sfidën nga pika e bardhë e penalltisë, ndërsa pak minuta më vonë kapiteni i Vllaznisë shënon edhe golin e dytë personal. Rrugën e rrjetës e gjen edhe Mala dhe kuqeblutë mbyllin pjesën e parë në avantazh 3-0.
Autogoli i Juriç në fillimin e pjesës së dytë solli pak optimizëm në kampin e Tiranës, por është Gruda që shënon sërish për shkodranët.
Akordohen 17 minuta shtesë për shkak të vonesave që erdhën për shkak të sjelljes së tifozëve. Tirana fiton një penallti që kthehet në gol nga Bajrovic. Bardheblutë mundohen në minutat e mbetura (shënojnë një gol, që anulohet nga VAR), por nuk arrijnë që të ndryshojnë fatin e kësaj sfide.
Mbyllet 4-2 për Vllazninë klasikja e luajtur në Lushnjë. Shkodranët ngjiten në kuotën e 18 pikëve dhe momentalisht janë në vendin e parë në renditje, ndërsa Tirana mbetet në kuotën e 11 pikëve dhe tashmë është shumë pranë zonës që të zbret në kategorinë inferiore.
Egnatia duket tërësisht me një fytyrë tjetër në këtë sezon. Ndryshe nga çfarë na ka mësuar në vitet e fundit, ku ekipi i Tetovës fitonte gjithçka që i dilte përpara në fillimin e kampionatit dhe më pas e ulte disi tempin në fund kur e kishte siguruar objektivin, këtë herë është një histori tjetër.
Te Egnatia nuk po arrin dot të shohin dy fitore radhazi, teksa tani janë mundur në transfertë nga Laci në shifrat 2-0. Goli i parë u shënua nga Prodani në minutën e 11, ndërsa i dyti erdhi pas një perle të Melos nga distanca. Një fitore e madhe për kurbinasit që mundin kampionët e Shqipërisë dhe tani shkojnë e 10 pikëve duke lënë vendin e fundit dhe duke parakaluar Bylisin. Ndërsa Egnatia konfirmon formën e dobët duke numëruar vetëm një fitore në pesë ndeshjet e fundit.
